25 мая, Брэст /Кар. БЕЛТА/. У Брэсцкай вобласці больш як 10 тыс. чалавек запісаліся на цэнтралізаваныя экзамены па профільных прадметах, паведамілі карэспандэнту БЕЛТА ў галоўным упраўленні па адукацыі Брэсцкага аблвыканкама.
У паўднёва-заходнім рэгіёне цэнтралізаваныя экзамены пройдуць у 17 пунктах - у чатырох універсітэтах, шасці каледжах і сямі ўстановах агульнай сярэдняй адукацыі. У вобласці на ЦЭ па профільных прадметах на 26 мая зарэгістраваліся 10 087 юнакоў і дзяўчат. На цэнтралізаваныя экзамены па рускай і беларускай мовах, якія будуць арганізаваны 29 мая, запісаліся 10 084 чалавекі. Больш за ўсё ўдзельнікаў будуць здаваць рускую мову (7439), матэматыку (3111) і біялогію (2168).
"Ва ўсіх рэгіёнах распрацаваны графікі арганізаванага прыбыцця ўдзельнікаў да пунктаў правядзення цэнтралізаваных экзаменаў. Дастаўка навучэнцаў будзе ажыццяўляцца ад школы ў суправаджэнні педагагічнага работніка", - адзначылі ў галоўным упраўленні па адукацыі. У Брэсцкай вобласці задзейнічаюць 171 школьны аўтобус для падвозу 2449 дзяцей. На тэхніцы аўтобусных паркаў давязуць да месца 3113 навучэнцаў. Таксама яны змогуць скарыстацца грамадскім транспартам.
У пунктах правядзення цэнтралізаваных экзаменаў будзе забяспечаны прапускны рэжым, арганізаваны пост медыцынскай дапамогі. У прыярытэце таксама захаванне рэжыму інфармацыйнай бяспекі і бяспечныя ўмовы знаходжання дзяцей. Для ЦЭ ва ўстановах адукацыі Брэсцкай вобласці падрыхтавалі 480 аўдыторый. Будзе задзейнічана больш як 2 тыс. педагагічных работнікаў.
"У аўдыторыях правядзення ЦЭ выключаны доступ да падручнікаў, вучэбных дапаможнікаў, даведачнай інфармацыі па вучэбных прадметах. Там размешчаны ўзоры бланкаў адказаў, ёсць лісты для рабочых запісаў. У полі зроку ўдзельнікаў цэнтралізаванага экзамену будуць гадзіннікі. Выключана прысутнасць у аўдыторыях блізкіх сваякоў удзельнікаў ЦЭ", - звярнулі ўвагу ў галоўным упраўленні па адукацыі.
Для тых, хто не зможа прыняць удзел у ЦЭ па ўважлівай прычыне ва ўстаноўленыя даты, прадугледжаны рэзервовыя дні.-0-
