Галоўная // Раён // Пра раён

Пра раён

Баранавіцкі раён знаходзіцца на паўночным усходзе Брэсцкай вобласці і мяжуе з Мінскай і Гродзенскай абласцямі. Плошча раёна складае 2,17 тыс. км², а гэта каля 1% тэрыторыі ўсёй Беларусі і 6,7% тэрыторыі Брэсцкай вобласці. У склад раёна ўваходзіць 14 сельскіх Саветаў.

У 239 сельскіх населеных пунктах пражывае 27,7 тыс. чал. У міры і згодзе тут жывуць прадстаўнікі 33 нацыянальнасцей. Асноўнае насельніцтва раёна беларусы (88,5%), затым па прадстаўніцтве ідуць палякі (4,6%), рускія (4,5%) і ўкраінцы (0,8%). На тэрыторыі раёна зарэгістравана і дзейнічае 43 рэлігійныя абшчыны, у іх ліку 22 праваслаўныя, 10 рымска-каталіцкіх і 11 пратэстанцкіх.

Баранавіцкі раён адзін з буйнейшых вытворцаў сельскагаспадарчай прадукцыі ў Брэсцкай вобласці.

Агульная зямельная плошча раёна складае 217,025 тыс. гектараў, з іх 96,3 тыс. гектараў – сельскагаспадарчыя ўгоддзі, у тым ліку 76,0 тыс. гектараў ворнай зямлі, землі ляснога фонду 68,5 тыс. гектараў.

Арганізацыйная структура аграпрамысловага комплексу раёна прадстаўлена 1 закрытым акцыянерным таварыствам і 9 адкрытымі акцыянернымі таварыствамі.

Найбольшымі з іх з'яўляюцца ААТ «Птушкафабрыка «Дружба», якая на працягу апошніх гадоў з'яўляецца лідарам усёй мясной птушкагадоўчай галіны рэспублікі, ААТ «Баранавіцкая птушкафабрыка», якая з'яўляецца лідарам у рэспубліцы ў яечнай вытворчасці, ААТ «Агракамбінат «Мір», што спецыялізуецца на адкорме буйной рагатай жывёлы.

Прамысловы патэнцыял раёна прадстаўляюць 6 прадпрыемстваў.

Аб'екты гандлю – 159, аб'екты бытавога абслугоўвання насельніцтва – 54, аб'екты харчавання агульнадаступнага карыстання – 32.

У сферы малога бізнесу ажыццяўляюць дзейнасць:

- юрыдычныя асобы - суб'екты малога прадпрымальніцтва - 343

- індывідуальныя прадпрымальнікі - 623.

У цэнтральных сядзібах раёна ёсць 7 комплексных прыёмных пунктаў камунальнага ўнітарнага шматгаліновага вытворчага прадпрыемства жыллёва-камунальнай гаспадаркі «Баранавіцкая раённая ЖКГ» (КУШВП ЖКГ «Баранавіцкая раённая ЖКГ»), дзе жыхарам раёна аказваецца ўвесь спектр бытавых паслуг.

У раёне функцыянуе дзяржаўная ўстанова «Тэрытарыяльны цэнтр сацыяльнага абслугоўвання насельніцтва Баранавіцкага раёна» па аказанні сацыяльных паслуг грамадзянам.

Арганізавана работа 9 сацыяльных пунктаў: 2 стацыянарныя і 7 з выязной формай работы.

Медыцынскую дапамогу насельніцтву раёна аказваюць Баранавіцкая гарадская паліклініка №3 на 380 наведванняў за змену.

Структура аховы здароўя Баранавіцкага раёна прадстаўлена 50 арганізацыямі аховы здароўя:

13 амбулаторый урача агульнай практыкі, 31 фельчарска-акушэрскі пункт, Гарадзішчанская гарпасялковая бальніца на 35 ложкаў, Навамышскі хоспіс на 30 ложкаў, 25 з якіх хоспісныя, 3 бальніцы сястрынскага догляду на 118 ложкаў, міжраённыя дыспансеры і іншыя ўстановы горада. Укараненне стацыянаразамяшчальных тэхналогій у Баранавіцкай гарадской паліклініцы №3 забяспечваецца развіццём сеткі аддзяленняў дзённага знаходжання і стацыянараў дома. На базе амбулаторый і гарадской паліклінікі №3 разгорнута 36 ложкаў дзённага знаходжання.

Сістэма адукацыі раёна ўключае: 22 установы агульнай сярэдняй адукацыі (18 сярэдніх школ, 4 базавыя школы), 12 устаноў дашкольнай адукацыі, 1 цэнтр карэкцыйна-развіваючага навучання і рэабілітацыі, 1 сацыяльна-педагагічны цэнтр, 1 цэнтр дадатковай адукацыі, 1 аздараўленчы лагер, 2 дзіцячыя дамы сямейнага тыпу (11 дзяцей).

У раёне функцыянуюць: дзяржаўная ўстанова адукацыі «Брэсцкае абласное кадэцкае вучылішча», дзяржаўная ўстанова адукацыі «Моўчадская санаторная школа-інтэрнат», установа адукацыі «Навамышскі дзяржаўны аграрны каледж» (падпарадкаванне – галоўнае ўпраўленне па адукацыі Брэсцкага аблвыканкама).

Для арганізацыі фізкультурна-аздараўленчай, спартыўна-масавай работы і турызму функцыянуюць 115 фізкультурна-спартыўных збудаванняў, у тым ліку: 20 спартыўных залаў, 23 спартыўныя ядры, 52 плоскасныя збудаванні, лыжаролерная траса з напаўадкрытым стрэльбішчам на 20 мішэнных установак, хакейная каробка і 6 басейнаў (2 стандартныя, 4 міні-басейны).

Арганізацыю фізкультурна-аздараўленчай і спартыўна-масавай работы з насельніцтвам ажыццяўляе ўстанова «Баранавіцкі раённы фізкультурна-спартыўны клуб «Надзея».

У сферы культуры функцыянуюць 25 устаноў клубнага тыпу, 30 бібліятэк, 4 школы мастацтваў.

У клубных установах раёна дзейнічае 226 клубных фарміраванняў.

13 калектываў мастацкай творчасці са званнем «народны» і «ўзорны», 1 калектыў са званнем «заслужаны» аматарскі калектыў.

На тэрыторыі Баранавіцкага раёна размешчаны 212 помнікаў гісторыі і культуры, 110 помнікаў Вялікай Айчыннай вайны, з іх 66 воінскіх пахаванняў.

У Дзяржаўным рэестры па Баранавіцкім раёне зарэгістраваны 31 аб'ект гісторыка-культурных каштоўнасцей Рэспублікі Беларусь. З іх 8 помнікаў археалогіі, 16 помнікаў архітэктуры, 6 помнікаў гісторыі, 1 помнік мастацтва. У раённым цэнтры рамёстваў аг. Русіно створана база для навучання народным рамёствам, тут жа пры цэнтры створаны этнаграфічны музей. Пазнаёміцца з літаратурнай спадчынай і жыццём нашага земляка Адама Міцкевіча можна ў музеі-сядзібе Міцкевічаў «Завоссе».

Сёння Баранавіцкі раён гарманічна спалучае традыцыі і сучаснасць, уносіць значны ўклад у сацыяльна-эканамічнае развіццё вобласці і рэспублікі, робіць усё для таго, каб паляпшаліся ўмовы працы, быту і адпачынку людзей, дзякуючы якім наш раён з кожным годам становіцца прыгажэйшым і багацейшым.