Днямі ў Баранавіцкім раённым Цэнтры рамёстваў адбылася прэзентацыя выставы «А пад падушкай сон прылёг на бачок». Сярод экспанатаў – вышытыя вырабы мясцовых майстрых, дакументальныя фотаздымкі і інсталяцыя традыцыйнага беларускага спальнага месца.
Пачалося мерапрыемства з тэатралізаванай замалёўкі «Спі, мая дзетачка» у выкананні загадчыка Жамчужненскага СДК Алены Пячко і ўдзельнікаў узорнага ансамбля танца «Вясёлка» гэтага сельскага Дома культуры.
Загадчык раённага Цэнтра рамёстваў Сяргей Майсеня распавёў гасцям мерапрыемства пра гісторыю ўзнікнення падушак, расказаў пра іх разнастайнасць і спосабы выкарыстання. Паведаміў пра звычаі і абрады, звязаныя з такім звычайным і звыклым для кожнага з нас прадметам побыту.
Першымі наведвальнікамі выставы сталі начальнік аддзела культуры райвыканкама Аксана Шчэрба, а таксама навучэнцы 5-га класа Русіноўскай сярэдняй школы са сваім класным кіраўніком.
Пасля прэзентацыі з мэтай папулярызацыі і захавання народных мастацкіх рамёстваў праз перадачу свайго вопыту кіраўнік гуртка раённага Цэнтра рамёстваў Наталля Хілько правяла для дзяцей майстар-клас па мастацкім роспісе «Кветкі на падушцы».
